Original: Deutsch
Wir die Burgermeistere, Scheffene vnd Rat zu franckenfort Irkennen vns uffentlich mit diesem briefe, das fur vns stunde an vnnser / genwurtikeit Sifridt von Spier vnnd erkante sich uffenberlich, das er mit wole vorbedachtem beraden mude, als er das zuthu(n) macht / habe nach lute eyns versiegelten entscheit brieffs vnd gutlichen uszspruchs dar uber sagende, der an dem ende fur vns gelesen wart, / recht vnd redelich verkaufft habe vnd gabe auch fur vns uff den bescheiden luten wicker froschen dem Jungen, vnserm Ratgesellen , Gude- / chyn, syner elichen huszfrauwen, vnd Iren erben syn teile vnd recht, als er itzu(n)t habe an dem Salehofe by vns, mit syner Zugehoru(n)ge. / Dartzu den Renten vnnd gefellen dar Inne vnnd die dartzu gehorent. Solich syn teile vnd recht von synen vatter vnd mutter seligen / yme dar komen vnnd gen synen geswistern zu loisz vnd teile worden sy; vnnd sy der verkauff gescheen vmb funfftzig guldenn gutter / franckenfort(er) werunge; vnnd bekante Sifridt obgenant, das er des geltis dar vmb von den egenanten wickern vnnd Gudechyn / gutlich vnnd wole betzalt sye vnnd gewert, vnnd hait auch fur vns uff dasselbe gelt vnnd das egenante syn teile vnd recht, als er an / dem Salehoff by vns habe, mit syner zugehoru(n)ge zusampt den Renten vnnd gefellen dar Inne vnnd die dartzu gehorent, luterlich vnd / gentzlich vertziegen. Auch hait Sifridt obgenant fur sich vnnd syn erben den egenante(n) wickern, Gudechin vnnd Iren Erbenn ge- / sprochen vnnd sich yne fur vns versachewalt fur werschaff vnnd alle recht ansprache Jare vnnd tage nach der Stede franckenfort / recht vnnd gewonheit. Doch Inne dieszen vorgeschrieben artickeln mit beheltenisse vnnd vnschedlich dem Riche, dem Rade vnnd / der Stat zu franckenfort an Iren dinsten, gnaden vnnd friheiden. Hie by sint gewest Arnolt von holtzhusen , Johann von Glauburg , / Scheffene, Merckel von Breidenbach vnd andere Erbere lude. Des zu Orkunde han wir der egenante(n) vnnser(er) Stede groisz Ingesigel / durch Irer beider syten bede willen an diesen brieff thun hencken. Datu(m) Anno d(omi)ni Millesimo Quadringentesimo Septuagesimo / Qui(n)to In vigilia Sancti Andree[?] Apostoli.