Original: Deutsch
WIR Catarina Belgica Princessin zu Oranien, Grävin zue Nassaw etc. Grävin zue Hanaw unndt Rieneck, Fraw zue Müntzenberg etc. Wittib unndt Vormundin, thuen kundt mit dießem brief offentlich bekennende, Nachdem unser in Vormundschafftnahmen liebs angehöriger zu Rodheim Johann Kleinschmidt uns supplicirend ersucht unnd bericht hat, wie das er sich zu Ursell unter dem Ertzstifft Meintzs ehelichen verheurathet, in willend sich daselbsten heußlichen niederzuthun, darzu er aber nichtt kommen noch angenommen werden möge, er seye denn angezogener leibeigenschafft zuvor erlaßen, unnd keinen nachfolgenden hern habe, daß wir demnach gedachten Johann Kleinschmidt der angeregten leibeigenschafft unnd verwandnuß, damitt er bißhero der herrschafft Hanaw etc. verwant unnd zugethan gewessen, also uff sein underthenig unnd demutiges bitten ledig gezehlt unnd geben haben, thun auch solches in unnd mitt crafft dieß brieffs, jedoch mit dem außtrücklichen vorbehaltt, im fall er Johann Kleinschmidt uber kurtz oder lang sich wider in wohlg[enannter] Graveschafft Hanaw etc. heußlichen niederthun unnd setzen würde, das er ohngeachtet dießer ledigzehlung in voriger verpflichtung unndt verwandung stehen, unnd sich wie andere mehrwohlg[enannter] herschafft etc. underthanen erzeigen unnd verhalten soll, alles ohne gefehrde, zu urkundt haben wir dießen brief mit eigen handen unterschrieben, unnd mitt unserm vormundlichen Secretinnsiegell wissentlich betrucken lassen, So geschehen zu Hanaw den 24. Aprilis Anno etc. Sechszehenhundertt unndt Sechszehen.