Leni Jöpen | Jeschenke för et Jüppche
>>> Zum Starten der Tonaufnahme klicken Sie bitte auf das Foto oder auf "Abrufen des Objektes" unter dem Block "Zitieren".
Et Jüppche hät Jebotsdach höck
un kann net haale sich vör Jlöck.
Jebotsdach es wie Hellije Ovend,
e bitzje och wie Fastelovend.
Öm fönf Uhr morjens steit hä op.
Un dann weed op de Tromm jeklopp.
De Mamm röf: „Jüppche, loss dä Krach,
du mäs et janze Huus noch wach.“
Sechs Käzjer stich se donoh an
om Koche met vill Marzepan.
Vör luuter Jlöck, mer jlööv et koom,
schlät Jüppche nu de Kuckeleboom.
De Mamm meint: „Jüppche, hür bluß op,
du wees dovon noch doll em Kopp.“
Enzwesche es de Papp och wach.
Söns steit hä op öm halve aach.
Hä schnapp sich Jüppche en de Ärm.
Et weed em öm et Hätz janz wärm.
„Vill Jlöck, du meng klein Levverwursch.
Du bes mir wahl ne jecke Pursch.
Dröm jing ich dir e Rollbrett koofe.
Dann kannste noch jet flöcker loofe.“
Et Jüppche strahlt de Papa an:
„Dat wollt ich doch allt emmer han.“
Vör luuter Jlöck, mer jlööv et koom,
schlät Jüppche nu de Kuckeleboom.
De Mamm meint: „Jüppche, hür bluß op,
du wees dovon noch doll em Kopp.“
Och Broder Pitter well metfiere,
dem Bröderche nu jratuleere.
Er hät e zemlich jroß Jeschenk,
wo noch e Handdoch drövver hängk.
„He, dat han ich mir usjedach,
of de dat wahl jefalle mag?
Ich han för dich en echte Mösch,
de Käfich hange mer en de Köch.“
Die Mösch fängk löstich an ze senge.
Do sieht mer Jüppche wedder sprenge.
Vör luuter Jlöck, mer jlööv et koom,
schlät dä Klein de Kuckeleboom.
De Mamm meint: „Jüppche, hür et op,
du wees dovon noch doll em Kopp.“
Drop kütt eren Marizebell.
Met senger Schönheit hät et Spell.
Et schlief, och wenn et jeder fopp,
et Naaks met Klötz op sengem Kopp.
Doch litt dat Jüppche em am Hätz.
Et hät en jän, dä kleine Fetz.
„E staats Kostüm han ich jemaat
su janz noh Indianeraat,“
dat sät et, hält et Jüppche hin.
Dä meint, hä könnt net richtich sen.
Vör luuter Jlöck, mer jlööv et koom,
schlät dä Klein de Kuckeleboom.
De Mamm meint: „Jüppche, hür bluß op,
du wees dovon noch doll em Kopp.“
Als Nächste kütt eren de Jroß.
Se es net mih su jot ze Foß.
Zoeesch sök se noch flöck ehr Zäng
un röf: „Wat hät mer an de Jäng?“
Om Rögge hält se jot versteck
e Äpche, wat se selvs jestreck.
Et Jüppche janz verjnöch nu spengks,
eimol rächs un eimol lenks.
Dann hät dat Dierche hä erkannt.
De Jroß, die weed bal ömjerannt.
Vör luuter Jlöck, mer jlööv et koom,
schlät Jüppche wedder Kuckeleboom.
De Mamm röf: „Jüppche, hür et op,
du wees dovon noch doll em Kopp.“
Jroßvatter kütt op einem Schluff
us senger Kammer en de Stuff.
Dä zweide Schluff konnt hä net fenge,
doch wollt er sie Jeschenk och brenge.
Er sät: „Ich wünsch dir zom Jebotsdach Jlöck
un Joddes Säje alle Zeck.
En Övverraschung han ich och.
Am Sonndach fahre mer mem Zoch
noh Kölle en de Zoo all hin
un luure, wo de Aape sen.“
Vör luuter Jlöck, mer jlööv et net,
mät Jüppche sich allt doför fit.
Er höpp eröm, kratz sich un danz
un föhlt sich janz wie ne Schimpanz.
Zom Schluss kütt Lumpi jratuleere.
Och hä well met dem Jüppche fiere.
En senger Schnüss hält er e Strüßje
von rut un wieß Kamellerüsje.
Er hät jet dran erömjeschnüffelt
un e paar allt selvs jemüffelt.
Et Jüppche schängk: „Dat deit mer net,
du schliefs net mih bei mir em Bett.“
Hä nimp em fott dat Strüßje flöck,
dann Jupp dat Höngkche an sich dröck.
Vör luuter Freud, mer jlööv et koom,
schlät hä met Lumpi Kuckeleboom.
De Mama laach: „Ich jevve op,
ich jläuv, du bes allt doll em Kopp.“
de
