Abbildung:
Gedicht zur Goldkonfirmation 1982 von Helmut Metzger
Im erschte Weltkrieg voller Schade
warn unser Vädder all Soldate.
Doch jeder hat emol voll Güt
Sechzeh un siebzeh Urlaub grieht!
Wär's nit gewest, ich sags Eich froh,
do wären mer hier gar nit do !
Doch weil's so war, do hen mer strikt
's Gaslicht vun dere Welt erblickt !
Ja, im Johr siebzeh, achzeh anne,
hot sich de Storch misse ermanne !
Ball dut's in jedem Haus sich rege !
Ganz Derkem schwelgt im Kinnersege !
Doch nit bloß hierher fliegt de Stork;
Aa Grethe, Seebach, Hardeborg
werd heemgesucht jetzt, trotz Krieg - o je --;
des hetten ehr mol misse seh !
"Kriegswar"? Vun wege! Hol's de Schinner !
Mer waren "Wiedersehenskinner" !
Die Hebamm Heisler voll Gemüt
die hot als kaum die Kurv noch grieht.
Stick zeh Paar Schuh - mer is betroffe -
hot die in eem Johr abgeloffe !
Un aa die Goßweilern in Nöte
rennt rum in Hardeborg un Grethe !
De Klapperstork in u(n)gelo
Zu' Schmitte und zu's Vester's gflo,
zu's Hemmerlings, zu's Werners, Hauers,
Zu's Löwes, Birons und zu's Bauers !
Zu' Weiße bringt er voller Hatz
e liewi, junge Zellmatratz!
De Stork, er kummt zum Tüncher Vogt,
un immer reißt noch nit de Docht.
Samt Hebamm geht's dann zur Fraa Ihrig,
zu's Orthe, Metzgers - s'war nit schwierig.
Er zieht bei's Klingels an de Klingel,
bringt aa zu's Künkeles een Schlingel.
Dann bringt der gute Adebar
en Pälzer Känig Ludwig gar !
Dann bringt er Mädcher! Owends achte,
s'war dunkel schun, besucht er's Schachte;
Zu's Schneiders bringt er dann e Maid,
zu's Schüttges, Dambachs - liewe Leit !
Dann kriegen 's Bletzers noch e Bäsel;
Zu's Haase bringt er e klee Häsel.
Dann fliegt er in die Sachsehütt
un bringt glei s' Helfers Hanna mit.
Zu's Gräbers kummt er aa nit minder:
trotz Summer bringt er die klee Winder.
Dann geht er mit de Hebamm Heißler
die Trepp nuff, bringt die Ina Deißler !
For unsern Stork is des e Luscht,
er fliegt zu Berger, Röth un Bruscht.
's Altvadders Käthche kreischt im Schnawwel
s' Bornträgers Else macht Gezawwel !
Dann widder Buwe ! 's warn kee kranke
die transbortiert de Stork zu's Ranke
zu's Kempfe, Bernhards, Feierbach,
un's Harreusse. Er wird schwach,
dann war's so häß; ja ohne Stuss,
s' war verzisch Grad no Chelius !
Des war e Wussle, Laafe, Renne !
Ich kann se gar nit all heit nenne
bei dere viele Rennerei !
Zwä Temple waren aa debei!
Und außerdem kämen barduh
noch die katholische dezu!
Doch eens, ehr Freunde, des is sischer:
s'warn lauter gute Pälzer Krischer !
Als ABC-Schütz, meine Güt,
hen mer die beschte Lehrer grieht.
War des e Johle un e Brume:
Mer sin zum Lehrer Allbach kumme;
un unser Mädcher hen solid
die Fräulein Faulhaber, glaab, grieht !
Un wie mer dreizeh waren schunn,
kummt dann die Konfirmandenstunn.
Beim Parre Heilmann warn die eene
beim Parre Grieß kannscht anre sehne;
Un dann die dritt Grupp war beflisse
beim Parre Emrich - Ehr werns wisse !
Wie Kathechismus un die Psalme
im Kopp warn, dass er fascht dut qualme,
do werre mer dann knall un fall
aa kunfermiert. Ehr wissen's all !
Dann hot mer uns, des sin kee Bosse
uff unser Umwelt losgelosse.
Mer kann aa sa: Mer hot voll Strunz
die Umwelt losgelosst uff uns !
de ee(n) bleibt Schüler wie bisher,
der annere kummt in die Lehr.
Mer machen's, wie mer's mache muss:
Bussieren, heiraten am Schluss !
Die Buwe, wu jetzt Männer groß,
die wern Soldat, de Krieg geht los !
Un wie der Vökermord vorbei
do fehlen viel vun uns - oh weih !
Kriegskinner warn mer - Du, ich , jeder -
Kriegsopfer warn mer paar Johr speeter !
Doch's Lewe, Freunde, bleibt nit steh,
Mer hen's erlebt un mer hen's gseh!
Un heit, do gheern mer zu de Alte
un wollen ehrlich Rückschau halte !
Jetzt, wu uns s' goldne Straißel ziert,
seit fuchzisch Johr grad kunfermiert,
do wollen die - nit iwertriewe -
wu von uns iwrisch sin gebliewe,
sich treffe, redde und verzehle
vun friehr als, "vun de alte Behle".
Doch unser Dote, ich sag's frei,
die sin im Geischt bei uns debei !
Mer henn heit gsunge wie e Lerch
un warn mol widder in de Kersch,
In die mer - Hand uff's Herz dohin -
zu wenig nei(n) als gange sin !
Mer wolln uns frääe un nit schwanke
un em Dekan vun Herze danke
grad so wie denne Fraue hier,
wu uns betreue im Revier,
dass mer so schee beisamme sin.
S'is for uns all en Mordsgewinn !
Den scheene Dag, ich sag's vermesse,
den wern mer nit so schnell vergesse !
Foto-Sammlung Adolf Krapp, Ordner 9: Gold-Konfis Bad Dürkheim
Die Fotosammlung war die Arbeitsgrundlage für das Buch "Bilddokumente über Alt-Dürkheim", siehe weiter unten unter "Literatur".
de
